सुनील मनोहर गावसकर यांना आपण ओळखतो ते भारताचा महान क्रिकेटर म्हणून. ओपनिंग बॅट्समन या नात्यानं त्यांनी क्रिकेटच्या इतिहासात स्वत:चा एक वेगळा आदर्श निर्माण केलाच, पण एक क्रिकेटर म्हणून रिटायर झाल्यावरही त्यांनी विविध भूमिकांमधून खेळाशी आपलं नातं जपलं. डी. वाय. पाटील युनिव्हर्सिटीच्या वतीनं गावसकर यांच्या क्रिकेट कर्तृत्त्वाचा बुधवारी खास गौरव करण्यात येणार आहे. तो त्यांना मानद डॉक्टरेट प्रदान करून.
सुनील मनोहर गावसकर... भारतीय क्रिकेटची ओरिजिनल वॉल. साठ वर्षांच्या आयुष्यात गावसकर यांच्या वाट्याला आजवर अनेक मानसन्मान आले. बुधवारी आणखी एका सन्मानाचं भाग्य त्यांना लाभणारय. नवी मुंबईच्या डॉ. डी. वाय. पाटील युनिव्हर्सिटीनं गावसकर यांना मानद डॉक्टरेट प्रदान करण्याचा निर्णय घेतलाय. डी. वाय. पाटील युनिव्हर्सिटीच्या कोन्व्होकेशन सोहळ्यात गावसकर यांना ही डॉक्टरेट देण्यात येईल.
सचिन तेंडुलकर या नावानं जगभरातल्या क्रिकेटरसिकांवर गारूड करण्याच्याही दीड दशकआधी भारताला क्रिकेटच्या नकाशावर मानाचं पान मिळवून देणारं नाव होतं सुनील गावसकर.
ऑल टाइम ग्रेटेस्ट ओपनिंग बॅट्समन म्हणजे सुनील गावसकर,फलंदाजीतल्या तंत्रशुद्धतेचा अंतिम शब्द म्हणजे सुनील गावसकर, निश्चयाचा... एकाग्रतेचा महामेरू म्हणजे सुनील गावसकर, महाराष्ट्रभूषण म्हणजे सुनील गावसकर आणि भारताची शान म्हणजेही सुनील गावसकर, सुनील गावसकर या नावाचं महात्म्य क्रिकेट इतिहासाच्या पानापानावर आढळतं.
कसोटी सामन्यांच्या रणांगणात दहा हजार रन्सचा पल्ला ओलांडणारा पहिला बॅट्समन. सर्वाधिक कसोटी शतकांचा विक्रम जवळजवळ वीस वर्षे मिरवणारा बॅट्समन. अशा एक ना अनेक पराक्रमांनी सुनील गावसकर हे नाव क्रिकेटच्या दुनियेत अजरामर करून ठेवलं आहे.
सुनील गावसकर यांचं कर्तृत्त्व इतकं मोठं आहे की, त्या नावाची महानता रेकॉर्डबुक्सच्या बाऊंड्रीलाइनमध्ये मावणारी नाही, क्रिकेटच्या दुनियेत भारतीयांना ताठ मानेनं जगण्याचा आत्मविश्वास दिला तो सुनील गावसकर यांनी, भारतीय क्रिकेटला प्रोफेशनॅलिझमचा अर्थ समजावून दिला तोही सुनील गावसकर यांनीच.
गावसकर यांनी १९८७ साली आपली बॅट म्यान करून लेखणी परजली. टेलिव्हिजनच्या युगात कॉमेण्ट्री बॉक्समधला माइकही त्यांचं अस्त्र बनला. बीसीसीआय आणि आयसीसीमध्ये प्रशासकीय भूमिका बजावत असूनही गावसकर यांनी आपल्या लेखणीशी आणि कॉमेण्ट्रेटरच्या भूमिकेशी कधीही तडजोड केली नाही. त्यातूनच गावसकर यांच्यावर आयसीसीच्या क्रिकेट कमिटीचा राजीनामा देण्याची वेळ आली. आणि विशेष म्हणजे सुनील गावसकर त्या प्रसंगातही झुकले नाहीत. वयाच्या साठीतल्या या स्वाभिमानाचाच मानद डॉक्टरेटनं गौरव होत आहे.